Schiffenensee

2011

So, i dänke das isch für das Jahr z'letschte mau gsi, wo dr Säschu u ig am 11.11.11 si uf e See gange (für das Jahr).
Ou dä Tag isch für mi, was d'Fische a geit, nid dr Hammer gsi.
Fazit vo däm Jahr ich mager. Mis Ziu, e Zamder, ha ig am erschte Tag scho erreicht. Das isch villech dr Grund,
werum das Jahr für mi äuä scho am erschte Tag isch fertig gsi. Usser es paar Egli hetz nümme gä.
I muess no erwähne, dass ig i däm Jahr nid e so viu uf  e See ha chönne ga.
Aber, es het glich luschtegi u schöni Stunde gä.



U när hetz gheisse; ufruhme!
Leider gitz eifach ou unger Fischer "Souhüng", wo auess eifach lö la lige.
I wünsche mir, dass aui ihre Abfau doch wieder mit hei nä!
Es blibt äuä leider bi däm Wunsch.


Sunntig 2. Oktober. E wunderschöne Herbstag wie so mänge i däm Jahr.
Vili chlini Hechtli u Egli hei bisse. Ou öppe e Zander hei mir gspürt.....äbe nume gspürt!
Dr Säschu het de ämu no es schön Egli chönne hei nä.



Dr Hügli isch mit mir am 22. Septämber uf e Schiffi cho. Bitte fraget nid nach de Fische!
Derfür hei mir guggelet u gröhlet wie ne moore! Wie immer, we mit em Hügli ungerwägs bisch.
Aber, ei langersehnte Wunsch isch ändlech i Erfeüig gange! Mir hei zäme es Fondue uf em Bootli gno u das bi
schönschtem Herbschtwätter!







20. Septämber bi ig mit em Chlöisu dusse gsi. Im dicke Näbu si mir zum Hafe us. Einisch meh e nounummer was Fische anbelangt.
Der¨ür bi ig z'erscht mau bis zur Fribourger Ungerstadt ufe gfahre. Da d'Saane numme wenig Strömig het ka, hei mir
das chönne u dörfe erläbe.










Am 14. Ouguscht si dr Säschu u ig uf e See mit dr Absicht mau uf Zander mit totem Butz z'fische, was ja angäblech viu
Gedoud brucht. A dere hetz schlussänlech gfäut! Aber im nachhinein hätte mir äbe glich söue usharre.
Einzig e Muschuboum und zwe Brachsme a eire Gambe isch dr Erfoug gsi!




Da ig mis Ziu letschtz Jahr verpasst ha, bi ig mit em gliche itz nöije Jahr gstartet.
Es sötti doch müglech, dass ig ou mau e Zander fa. Unger dr Fachkundige leitig vo mim Personaltrainer
Remo, wo im Apriu no äxtra am Ebro amene Guiding-Kurs isch gsi, si mir am Eröffnigstag 16. Mai am haubi sächsi uf es See gstoche.



Kurz ein paar Tip's und ruck zuck! Da war er:



Zfride wienes Schit si mir a däm Tag dr See uf u wieder dürab. Ussert es paar verpasste Bisse u am
Remo siner Looserfäng isch das bim einzige Fang blibe.
Aber einisch me hei mir dörfe e luschtige und schöne Tag uf em See verbringe.
U am Abe wo ig bi hei gfahre, het mi dr Mond ou no es Guetnachtgschänkli g'macht!



***

Am 7. Mai hei mir ir begleitig vor Julia üses Boot am Schiffenesee startklar g'macht.

2010

Langsam geit d'Saison verbi uf em Schiffenesee. U wieder het däs See üs es paar toui Stunde gschänkt.
U wär weiss........ villech gitz ja doch no dä lang erwartet Zander!



So, ou mi obligatorisch Hecht ha ig für das Jahr am 28. Septämber ka. Es isch kes Monschter wie das vom letschte Jahr.
Derfür genau richtig für i Ofe.



***

Am 31. Juli bi  ig z'Gascht bim Remo uf sim Schiff gsi. Punkt haubi sächsi bi ig parat gsi für uf Ihri "Red Perl" z'gah.
Dr Remo isch zäme mit sim Päpu, em Roger, erschine und z'Abentür HÄTTI chönne afah.
Shit, seit dr Remo, i ha mis Gilet mit auem drum u dra deheime vergässe. I muess no mau zrügg uf Loupe.
Wärend dere Zyt hei dr Roger u ig z'Böötli parat gmacht.
Öppis nach de sächse si mir drü ab uf e See......
Shit, seit dr Remo nach öppe 10 Minute fahrt.
I hätti am Kolleg sini Ruetene u sis Zuebehör söue am Land la, är chunnt die Sache cho hole für a Oeschinesee!
Auso.....retour a Bootsstäg.
Öppe am viertu vor sibni hei mir chönne afah mit Fische.
Das isch äbe z'spät gsi! D'Fische bisse um die Jahreszyt numme zwüsche haubi sächsi u haubi sibni.
Bis am Mittag am eis hei mir nid ei Biss kah! Dä See isch tot!
Aber glachet u luschtig hei mir drü das auimau kah!





.....und hie no es paar Biudli, wo ig vom Roger ha übercho.
Es isch doch o mau schön, dass ig einisch vor dr Kamera z'gseh bi!











***
Am 10. Juni am Morge am füfi, si dr Stöffäli u ig zum erschte mau i däm Jahr zäme uf z'Böötli.
Bis am Abe am sächsi hei mir doch e schöne, luschtige, sunnige und ou e chli e erfougriche Tag verbracht.
Aber lueget säuber;


Es isch äbe no e chli fischter gsi! So am achti ume hei mir de mau einisch z'mörgelet u dr Remo isch ouno zueche g'fahre.







Da vor däm Boum hei mir doch mau e nätti bekanntschaft gmacht im vordere Jahr!


U hüt hetz es paar Egli gä! Isch doch schön e so?

-----------------------------------------------------------------------------------------------------------------

2009

Weekend vom 18./19.07.09:

Wiedermau hei dr Stöffu u ig zäme zwe Tag chönne ga fische. Trotz Räge am erschte Tag si mir vom 10 bis am 10 uf em See gsi.
Ertrag; 1 Egli u ca 15 Buzli. Trotzdäm si mir am Abe überglücklech gsi u hei dr plousch ka.
Am Sunnti si mir am haubi sibni uf e See u hei versuecht mit Butzli uf Hecht- oder Zanderjagd z'gah.
Natürlich ohni Erfoug....... z 'ersch ämu no!
När isch es passiert! I ha mi Butz gno u vor einte Site uf die angeri vom Boot ta u ha gseit, we itz nüt passiert ga ig doch hei.
Tami no mau, itze geit mi Butz no i dä Boum, wo quer im Wasser ligt. Super, ha uf au fäu e Hänger.
I versueche mi Butz z'rette u ziehne zrügg zum Boot. Äbe doch e Hänger, oder doch nid? Irgendwie zablett mi Ruetespitz.
Säääää-Päng........ "Bremse los und ab die Post"!
Mis Butzli geit mit Vougass dür da Boum richtig offene See. 50, 60 Meter witer usse gumpet doch dä Cheib zum Wasser us.
Nei nid dr Buz, e Hecht. U nid dr chlinscht. Stöffeli kurblet mau beidi Anker ufe, u meint mir hei ke Chance. Dä isch quer düre Boum.
Dä Fade risst uf jede fau. Mir fahre mau um dä Boum ume. Ir zwüschezyt ha ig versuecht dä e chli nöcher z'nä.
20 Meter zueche u wieder 15 Meter use. Mit emene chlinere Chrampf im Arm und ere liechtere lockerig vo däm, ha ig de wieder e chli chönne kurble.
Mittlerwile isch dr Stöffu ou mit em Kescher parat gsi. Aber wo isch die Beschtie? Plötzlrch luege ig näbe z'Boot und miner Ouge si uf dä Hecht fixiert.
Genau näbem Boot isch dä am usruehje. Dr Stöffu u ig si dermasse verchlüpft, dass mir so grossi Ouge hei gmacht, dass dr Hecht no me erschrocke isch
u no die grössere Ouge gmacht het und vorauem erstarrt isch. Souverän wie e aute Keschermeischter het dr Stöffu dä Hecht itz Netzli gno.

Darf ig Vorsteue:
I bi 120 cm und 13,5 Kilo schwär: (dä im Vordergrund)





Merci Stöffu, ohni Di, wär ig itze no uf em See!

Nachdäm mir dä deheime usgno hei und i Mundgrächti Portiönli gschnitte hei, si mir no mau zrügg uf e See.
Vis a vis i di nächschti schöni Bucht. U me glubts nid;
Säääää-Päng........ "Bremse los und ab die Post"!
Dr nächscht Hecht het wieder bi mir zuegschlage. Grad e so e gäbige 72er!

***

Am 25. Juni si dr Stöffu u ig zäme am füfi am Abe uf e See. E Biss wär e Biss! bis churz vor de nüne isch grad gar nüt gange.
So si mir haut zrügg richtig Hafe. Dr Stöffeli het no gmeint är müessi zum Schluss i de Böim obe fische. I dere Zyt,
wo är ds'Angeli vo de Äscht hest versuecht z'löse, ha ig mi liebling (Meps 3) i mis gwohnte Eggeli gschosse und siehe da:


Es prachts Exemplar vo stoutze 42 cm! E so macht doch das no fröid!
E chli dusse ir Natur u am Schluss no öppis feins für uf e Täuer.....

***

Am 16. Mai isch d'Eröffnig vom Schiffenesee gsi. Es isch nid mi Tag gsi. Irgend öppis ha ig da fautsch
gmacht. Jä nu, i ha ämu wieder uf em See chönne umeböötle.
Derfür isch isch es am 17. besser gsi. Vier schöni Egli (18, 24, 32 und 36 cm) ha ig chönne lande.

***
Judihui!!! Es isch wieder sowit! Am 24. Apriu hei dr Stöffu u ig z'Bootli wieder dörfe i Schiffenesee tue.
Mir si überglücklech, dass mir wieder uf däm schöne See dörfe ga fische.

 


-----------------------------------------------------------------------------------------------------------------

2007