Engstlensee
2011
Dr Remo, dr Ädu u ig si am 28. Ouguscht am Morge am vieri z'Loupe richtig Engstlesee gfahre.
Stärneklahre Himu hei üs itz Bärner Oberland begleitet. Am sächsi am See acho, hei üs chüehli 4 Grad i Empfang gno.
Mir si zügig hingere gloffe! Erschtens hetz warm gäh u zwöitens si mir vouer Hoffnig u Vorfreud gsi.
Im verlouf vom Morge hetz de bi aune drei öppe mau ar Ruete grupft. Einisch meh hei mir dört obe e wunderschön Tag chönne verbringe.
2010
29. Septämber am haubi nüni bi ig am(im) S(chn)ee gstange!
So richtig bisse hei si gar nid weue. Paul het mir am Abe zwar gseit, i sig ar fautsche steu gsi.
Das überprüefi de no mau.
Gfange ha ig de schlussändlech scho no eini. Das heisst, i ha se vom Buldo erlösst.
Agfange hets am scho am Morge. Plötzlech schwümmt vor mir e Buldochugle verbi wo e schöni Rägebögeler
spaziere gfüehrt het. Später am Nammitag, bi ig de chli witer vorne am See gsi. U lue lue, da chunnt die Chugele wieder.
Blitzartig ha ig e Ruete umgrüschtet u e Löffu montiert. Ziu isch nid d'Foräue gsi. Nei, i ha viu me vor Chugle zilet
wo dä Fisch zoge het. Öppe bim füfte Wurf hets ighänkt. Mi Hagge het sech mit dem Buldo verhängt und so
ha ig de chönne das Fischli vo däm läschtige Piercing, fachgrächt mit Narkose u Kiemeschnitt, chönne erlöse.
-----------------------------------------------------------------
2009
Am Samschti 25. Juli si Jacqueline und ig in Ringgebärg bi mire Cousine Käthi u Ihrem Ma dr Poul iglade gsi.
Nach mängem Jahr wo mir üs nümme hei gseh, hei mir am letschte Cousin- u Cousineträffe dä Termin abgmacht.
Da dr Poul ou e lideschaftleche Fischer sit Urzyte isch, het sech das doch guet troffe. Die zwöi Oberländer hei üs zum wunderbare
Ängstlesee ufegfüehrt. Trotz Wind u e chli Cheuti, si mir vier Stung am Fische gsi. Es hei de ou drei Rägebögeler u ei Kanak usegluegt.
Gäge Abe si de üser Froue mit Kafi u feinem Vieille Prune cho bsueche. Merci viu mau de zwe Dame.
Am achti am Abe hei mir de dr Wäg richtig Tal unter Dreder gno.
Aber zersch si mir natürlech no im Restaurant Schwarzental es feins Fondue ga ässe.
Hie a dere Steu, möchti mi no bir Tochter vo Steiners, dr Monika, ganz fescht entschoudige, dass ig mi, nachem Gästebuechitrag, nid gmäuded ha.
Aber darf ig d'Monika nomau bitte mir Ihri Emailadrässe la zuezcho. I verspriche, i mäude mi.
|
Copyright © 2011 mc-homepages. Webdesign by Max Christen Last updates: Fritig 11.Novämber --> Aare und Schiffenensee Sunntig 16. Oktober --> Bielersee |
............zum Gästebuch |