Arnensee
2010
Sunntig 25. Juli u das im gliche Jahr! Es komplimänt ad Behörde vom Arnesee oder dene guete Mainzelmändli wo dä Wäg wieder begehbar hei gmacht.
Mit em Remo und mit em Lücku si mir am Morge am sächsi wieder vorem Fischerhus gsi, u me het fasch nümme vo de Schäde gseh, usser es
paar Spure am Brunne u das dr Vorplatz vom Hus zum Brüggli e chli grösser isch worde.
Zwe Windschutzschattehocker!!
Am 4. Juli bi ig zum erschte mau ufe a Arnesee. Eigentlech hätti das vor e wäg grad söue la si.
Z'Wätter isch zum cho... gsi. Wo ig bi uf e Parkplatz cho, hets gheisse dr Wäg direkt zum Fischerhus sigi gsperrt es fähli zwöi Brüggli.
Gfischet ha ig glich no e chli. Aber es isch klar gsi, dass die ou nid bisse.
------------------------------------------------------------------------------------------------------------------------
2009
Wöu dr Mäntig so guet isch gsi, bi ig am Samschti 11. Juli am Morge am füfi wieder uf em Parkplatz vom Arnesee gsi.
Bim Fischerhus acho, ha ig grad mau e Setzruete parat gmacht u mit dr zwöite Ruete ha ig e chli afa löffele.
Churz drufabe ha ig mini erschti Kanadischi Foräue glandet mit em Löffu. Dr Tag hets guet gmeint mit mir.
Mit dr Setzruete ha ig drufabe drei Rägebögeler usezoge. 20 Mäter witer unge isch e Fischerverein usem Buechibärg am Fische gsi.
Abartig. Ihre Presi het genau 10 Minute gfischet u scho het är es Six-Päck Kanadier kah. I dere Zyt ha ig mi füft Fisch, e Kanadier, gfange.
Bir sächste Foräue ha ig zgfüeu ka (am haubi zwöufi) i chönnti dä numme locker a z'Land zie! U scho bi ig bestraft worde. Si ischmer
vor de Ouge ab. So bi ig haut, e chli gnärvt, zu de Buechibärgfischer abe u ha gseit, i bruche numeno mini sächsti.
Aber ou dört het wie verhäxt keni weue bisse, bis mir e Buechibärger e Stucki-Löffu gäh het. U luelue, nach öppe 15 Minute,
u mene witer gheimtyp vom Löffelispänder, ha ig mini sächsti Foräue kah. E witeri Kanadierforäue.
Merci no mau de Buechibärgfischer für e Löffu, e Typ und die luschtige Minute wo mir zäme hei verbracht.
------------------------------------------------------------------------------------------------------------------------
Am Mäntig 6. Juli bi ig mit em Remo u sim Kolleg em Lücku gäge die 11:00 a Arnesee cho. Es isch z'erschte mau gsi,
dass dr Lücku uf Foräue isch ga fische. Drum hei dr Remo u ig ihm e chli zeigt wies geit. Nachdäm är d'Ruete het parat gmacht,
het nume no e Beiimade a Hagge müesse u ab it'z Wasser dermit. So, het är dänkt, it'z no die zwöiti Ruete dri. Während däm är
die zwöiti parat macht, fat sini gsetzti Ruete scho afa zable (Afängerglück)! E prachts Rägebögeler u das nach öppe drü Minute.
Es söu e viuversprächende Tag gäh. Übrigens, am Remo u mi Ruete hei no keh wank gmacht, da het dr Lücku scho die zwöiti
u dritti Foräue am Land ka. Was mache äch dr Remo u ig fautsch? Mir hei zuegluet wie är sini Madene duet ufspiesse.
KATASTROPHAU: Är steckt die druf wie es Cipollatawürstli uf e nes Spiesli.
Auso, mache das dr Remo u ig ou so. Päng machts bim Remo u ou är het sini erschti dusse u gli drufabe ou bi mir.
Leider si üs ou no es paar (mindeschtens öppe sächs) vor Angle gumpet, oder z'Casscut het la gah.
Jä nu, am Schluss si mir mit 11 Foräue u 1 Egli zfride wienes schitt hei.
Merci Giele für dä schön Tag!
------------------------------------------------------------------------------------------------------------------------
2008
2. Juli 08 bi ig wieder zrügg a schön Arnensee cho. Wie im letschte Jahr ha ig wieder troumhafts Wätter kah.
Lucky-Catch ha ig bereits nach em dritte Wurf kah. E schöni Rägebogeforäue het zuebisse.
Leider isch das a däm Tag die einzigi gsi. U weu när dört nümme gloffe isch, ha ig e Spaziergang ume See gmacht u mis
Glück ou uf dr angere Seesite versuecht. Aber es het dr einzig Biss söue si. U so bi ig am Mittag z'friede wie nes Schitt wieder richtig Unterland gfahre.
------------------------------------------------------------------------------------------------------------------------
2007
Am z'Ischtig 31. Juli 07 si dr Remo u ig am Morge am haubi sächsi am wunderschöne Arnensee gsi.
Das gseht doch scho ganz viuversprächend us?
Aber äbe,
ou dä Tag hei mir mit Poulet u Würscht müesse verbringe.
Dr Remo het's no mit Butzli fah versuecht......
U so isches haut o scho wieder Abe worde. E Blick zrügg a dä See, wo mir wieder wärde zrügg cho!
Müed und mit eim Egli im Kofferrum, si mir hei gfahre.........
| Copyright © 2009 mc-homepages. Webdesign by Max Christen Last update: Samschti 28. Ouguscht 2010 --> Uesi Faeng |
............zum Gästebuch |